నాపాట: - గుండ్లపల్లి రాజేంద్రప్రసాద్, భాగ్యనగరం.

పల్లవి

నాపాట నోర్లలో నానాలి —

తేనెల తీయదనాలు పంచాలి॥

సుధలై హృదయాల్లో జారాలి —

శ్రావ్యమై వీనులకు విందునివ్వాలి॥

నాపాట గాలిలో తేలాలి —

గుండెల గూళ్ళలో నిలవాలి॥

కీర్తి కిరీటమై వెలగాలి —

మదుల్లో మధురమై మిగలాలి॥ ॥నాపాట॥

చరణం – 1

మల్లెల పరిమళమై విరియాలి,

మందార మాధుర్యమై మెరవాలి॥

కోయిల కుహూకుహులై పలకాలి,

కోట్లాది మనసులను అలరించాలి॥

పల్లెల పొలిమేర చేరాలి,

పట్టణ వీధుల్లో పరవశించాలి॥

పసివాడి నవ్వులా పులకించాలి,

పెద్దల మెప్పులూ పొందాలి॥ ॥నాపాట॥

చరణం – 2

వెన్నెల వాకిట్లో వెలగాలి,

వీణల స్వరాల్లో విహరించాలి॥

కన్నీటి చుక్కలను తుడవాలి,

కష్టాల చీకట్లను తరిమేయాలి॥

ప్రేమకు ప్రతిరూపమై నిలవాలి,

ప్రపంచానికే ప్రాణమై మారాలి॥

అక్షరాల హారమై అలరాలి,

ఆనంద గీతమై మార్మోగాలి॥ ॥నాపాట॥

చరణం - 3

గాయకుల గలగలా పాడించాలి,

శిశువులా పకపకా నవ్వించాలి॥

పశువులా తలలనూ ఊపించాలి, 

పామూలా పడగలూ ఎత్తించాలి॥

నవరాగమై నాట్యమాడించాలి,

చిరుగీతమై చిందులేయించాలి॥

వేణుగానమై మదులనూ మురిపించాలి,

సప్తస్వరాలై తన్మయత్వపరచాలి॥  ॥నాపాట॥  

చరణం – 4

పదమే పూవై పరిమళించాలి,

భావమే భానుడై ప్రకాశించాలి॥

రాగమై గంగలా పరవళ్ళుతొక్కాలి

రంజకమై జనహృదయాల్లో నిండాలి॥

తెలుగు తల్లికి తిలకమవ్వాలి,

తేటగీతమై తరతరాలుండాలి॥

హృదయాల్లో స్ఫూర్తిని నింపాలి,

గుండెల్లో చిరస్థాయిగా నిలవాలి॥ ॥నాపాట॥