మాటల మకరందాలు: - గుండ్లపల్లి రాజేంద్రప్రసాద్, భాగ్యనగరం.

మాటలు మధురిమలు చిమ్మాలి —

మల్లెల మకరందమై మనసుల్లో జారాలి,

మరువలేని మమతల మంజీరమై

మానవ హృదయాల్లో మోగాలి॥

మాటలు పరిమళాలు చల్లాలి —

పారిజాత పవనాలై పలకరించాలి,

పనులభారంతో అలసిన ప్రాణాలకు

పున్నమి చల్లదనమై తాకాలి॥

మాటలు వెలుగులు చిందాలి —

వెలుతురు వెన్నెలలై వీధుల్ని నింపాలి,

చీకటి చిక్కుల్లో చిక్కుకున్న జీవాలకు

చిగురించే చిరునవ్వుల్ని పంచాలి॥

మాటలు వీనులకు విందునివ్వాలి —

వీణాగాన స్వరాలై విరియాలి,

వినువీధిలో విహరించే ప్రతి స్వరం

వెన్నెల పాటగా మారాలి॥

మాటలు హృదయాలను కదిలించాలి —

హిమానీనదాలనైనా హత్తుకునే వేడిమై,

కఠిన మనసుల గోడలకైనా

కరుణా జలధారలై చేరాలి॥

మాటలు గుండెలను గుభాళింపజేయాలి —

గర్జించే గంగలా గంభీరమై,

నిరాశ నిశ్శబ్దాలను ఛేదించి

నూతన జీవనగీతాలు పాడాలి॥

మాటలు మనసులను మురిపించాలి —

ముద్దుబాలల నవ్వుల్లా మెరవాలి,

మురిసే మల్లెతీగల ఊయలై

మానవత్వాన్ని మైమరపింప చేయాలి॥

మాటలు కరుణామృతాలై కడగాలి — 

కత్తులై గాయపరచకూడదు, 

కలహాల కడలిని దాటించే

కల్పవృక్ష ఛాయలై నిలవాలి॥

మాటలు మనుషులను మేల్కొలపాలి —

మట్టిలో మాణిక్యాలను వెలికితీయాలి,

మంచి ముత్యాలు చల్లి

మమతానురాగాలు రేకెత్తించాలి॥

మాటలు మణిమాణిక్యాలు కావాలి —

మానవతా మంజీరాలై మోగాలి,

మనసుల మందిరాల్లో

మంగళదీపాలై వెలగాలి॥