105 వ సర్గ : - ఎడ్ల లక్ష్మి -సిద్దిపేట

 తండ్రి ఆజ్ఞ శిరోధార్యమని భరతునితో శ్రీరాముడు హితవు పలుకుట 

భరతుడు శ్రీరామునితో ఇలా అంటాడు

సోదరా! మా తల్లిని సంతృప్తి పరచుటకై 

తండ్రిగారు నాకీరాజ్యమును ఇచ్చినారు 

నా ఆధీనంలో యున్న ఈ రాజ్యమును, 

అన్నా! శ్రీరామా! నేను నీకు సమర్పించుచున్నాను

ఈ కోసలరాజ్యమును నీవు పరిపాలించుము.

ఈ విశాల రాజ్యమును రక్షించుటకు 

నీకు తప్ప ఎవరికి సాధ్యము కాదు. 

ఓ ప్రభ్రూ! అశ్వగమనము గాడిదకు కుదరనట్లు 

గరత్మంతుని గగనయానము

చిన్నపక్షికి సాధ్యము కానట్లు

నీ వలె రాజ్యపాలన చేయుటకు 

నాశక్తి చాలదు అది అసాధ్యమవును.

ఓ మహాప్రభూ! శత్రు సంహారసమర్థుడవైన

నీవు సింహాసనమును అధిష్టించి

వెలిగే సూర్యకిరణాలవలె బాసిల్లుచుండగా 

అయోధ్య ప్రజలు నిన్ను జూచి సంతోషించెదరు. 

మిక్కిలి దుఃఖితుడై విలపించుచున్న 

ఆ భరతుని జూచి శ్రీరాముడు ఓదార్చెను 

సోదరా! ఏ వ్యక్తికైనా దైవము వలె 

ఇష్టమువచ్చినట్లు ప్రవర్తించె శక్తి ఉండదు.