ధ్యానమే విజయానికి సోపానం: - దూడ వైష్ణవి, 9వ తరగతి, కేజీబీవీ కోటగిరి, జిల్లా: నిజామాబాద్

 

ధ్యానం వల్ల మనసు ఎలా ప్రశాంతంగా మారుతుందో, ఏకాగ్రత పెరిగి తెలివితేటలు ఎలా అభివృద్ధి చెందుతాయో వివరిస్తూ రాసిన కథ ఇది.
మా క్లాసులో వరుణ్ అని ఒక అబ్బాయి ఉండేవాడు. వరుణ్ చాలా తెలివైనవాడు, కానీ వాడికి ఒక పెద్ద సమస్య ఉండేది. అదేమిటంటే వాడి మనసు ఒక్క చోట నిలకడగా ఉండేది కాదు. క్లాసులో పాఠం వింటున్నప్పుడు వాడి ఆలోచనలు ఎక్కడో ఆడుకునే బొమ్మల మీదో, ఇంట్లో అమ్మ చేసే వంటల మీదో ఉండేవి. దీనివల్ల వరుణ్ ఎన్ని గంటలు చదివినా ఏదీ గుర్తుండేది కాదు. పరీక్ష పేపర్ చూడగానే తెలిసిన జవాబులు కూడా మర్చిపోయేవాడు. నేను ఎంత చదివినా బుర్రలోకి ఎక్కడం లేదు, నాకంటే తక్కువ చదివే వాళ్లకు మంచి మార్కులు వస్తున్నాయి అని వరుణ్ ఎప్పుడూ బాధపడేవాడు. వాడి మనసు ఎప్పుడూ ఏదో ఒక ఆలోచనతో అల్లకల్లోలంగా 
ఉండేది. 
ఒకరోజు వరుణ్ వాళ్ళ తాతయ్య దగ్గరకు వెళ్లి తన బాధ చెప్పుకున్నాడు. తాతయ్య వరుణ్‌ను ఇంటి వెనుక ఉన్న ఒక చిన్న నీటి కుంట దగ్గరకు తీసుకెళ్లారు. తాతయ్య ఒక రాయిని తీసుకుని ఆ నీళ్లలో వేశారు. నీళ్లన్నీ అలలు అలలుగా మారిపోయాయి. వరుణ్! ఇప్పుడు ఆ నీళ్ల అడుగున ఏముందో నీకు కనిపిస్తోందా? అని అడిగారు. వరుణ్ నీళ్లలోకి చూసి, లేదు తాతయ్యా! నీళ్లు కదులుతున్నాయి కదా, అంతా మసకగా ఉంది” అన్నాడు. తాతయ్య నవ్వి, సరే, కొంచెం సేపు ఆగు  అన్నారు. కాసేపటికి నీళ్లు నిశ్చలంగా మారాయి. ఇప్పుడు అడుగున ఉన్న చిన్న చిన్న రాళ్లు, రంగు రంగుల ఇసుక స్పష్టంగా కనిపించాయి. అప్పుడు తాతయ్య ఇలా చెప్పారు. వరుణ్! నీ మనసు కూడా ఈ నీళ్ల లాంటిదే. ఆలోచనలనే రాళ్లు విసురుతూ ఉంటే అది ఎప్పుడూ అలజడిగా ఉంటుంది. అప్పుడు నీకు ఏ విషయం సరిగ్గా అర్థం కాదు. అదే నీ మనసును నిశ్చలంగా ఉంచడం నేర్చుకుంటే, నీలో ఉన్న తెలివితేటలు ఆ అడుగున ఉన్న రాళ్లలాగా స్పష్టంగా కనిపిస్తాయి. దీనికే మన పెద్దలు ‘ధ్యానం’ అని పేరు పెట్టారు. తాతయ్య మాటలు విన్న వరుణ్, ఆ రోజు నుండి ప్రతిరోజూ ఉదయం, సాయంత్రం పది నిమిషాల పాటు ధ్యానం చేయడం మొదలుపెట్టాడు. మొదట్లో కళ్లు మÖసుకోగానే ఏవేవో ఆలోచనలు వచ్చేవి. కానీ మెల్లగా తన శ్వాస మీద దృష్టి పెట్టడం అలవాటు చేసుకున్నాడు. మనసు ప్రశాంతంగా మారడం మొదలైంది.
కొన్ని రోజుల తర్వాత అద్భుతం జరిగింది! వరుణ్‌కు క్లాసులో టీచర్ చెప్పే ప్రతి మాట స్పష్టంగా అర్థం కాసాగింది. మునుపు గంట సేపు చదివినా రాని పాఠం, ఇప్పుడు కేవలం పది నిమిషాల్లోనే వచ్చేస్తోంది. వాడి ఏకాగ్రత ఎంత పెరిగిందంటే, చుట్టూ ఎంత గోల ఉన్నా తను చదివే విషయం మీద నుండి దృష్టి మళ్ళేది కాదు. పరీక్షల్లో వరుణ్ అందరికంటే వేగంగా, సరైన సమాధానాలు రాశాడు. క్లాసులో అందరూ వరుణ్‌ని చూసి ఆశ్చర్యపోయారు. వరుణ్! నీ తెలివితేటల రహస్యం ఏంటి? అని అడిగితే, వరుణ్ నవ్వుతూ నా తెలివితేటలు ఎక్కడి నుంచో రాలేదు, నా లోపలే ఉన్నాయి. ధ్యానం ద్వారా నా మనసులోని అలజడిని తగ్గించి, ఆ తెలివిని ఎలా వాడుకోవాలో తెలుసుకున్నాను అని చెప్పాడు.
మన మనసు ఒక అద్దం లాంటిది. దాని మీద ఆలోచనలనే దుమ్ము ఉంటే ఏదీ సరిగ్గా కనిపించదు. ధ్యానం ఆ దుమ్మును తుడిచేసి, మనలోని అసలైన శక్తిని బయటకు తీస్తుంది. రోజుకు కొద్ది నిమిషాల ధ్యానం మనల్ని మేధావులుగా మార్చగలదు.
నీతి: నిశ్చలమైన మనసు అపారమైన తెలివితేటలకు పుట్టినిల్లు. ధ్యానమే విజయానికి అసలైన సోపానం.