విరాట్ ప్రభాస్ ప్రతిభ : - యామిజాల జగదీశ్

 

రూపాయి లక్ష బహుమతి సాధించిన ఒక చిన్నారి... కన్నవారి కోసం చేసిన పని అందరి హృదయాలను హత్తుకుంది! 
సొంతంగా డబ్బు సంపాదించే వయసు కూడా లేదు. కానీ, తాను గెలుచుకున్న తొలి బహుమతి మొత్తంతో దేశానికే ఆదర్శంగా నిలిచాడు ఈనాటి చిన్నారి వీరుడు! 
రోజూ తేయాకులు కోస్తూ, కష్టపడి వచ్చే ఆదాయంతో కుటుంబాన్ని పోషిస్తున్న కన్నవారి శ్రమను గుర్తించాడు 7వ తరగతి చదువుతున్న విరాట్ ప్రభాస్ అనే బాలుడు. తన పట్టుదల, కష్టపడే తత్వంతో సాంకేతిక పరిజ్ఞానాన్ని ఉపయోగించి ఒక కొత్త మొబైల్ యాప్‌ను తయారుచేశాడు.
ఈ అద్భుత ప్రతిభను గుర్తించి DP ఎడ్యుకేషన్ సంస్థ వ్యవస్థాపకులు శ్రీ ధమ్మిక పెరీరా, DP కోడింగ్ స్కూల్ ద్వారా విరాత్‌కు 1,00,000 రూపాయల నగదు బహుమతితో పాటు ప్రత్యేక అభినందనలు అందించారు.
అయితే, అసలు కథ ఇక్కడే మనసును కదిలిస్తుంది. ఆ డబ్బుతో తనకు కావలసినవి కొనుక్కోలేదు. తాను ప్రాథమిక విద్య నేర్చుకున్న పాత బడికి వెళ్లాడు. అక్కడ కొరతగా ఉన్న ఒక మైక్రోఫోన్, పిల్లలు ఆడుకోవడానికి ఒక బంతిని కానుకగా ఇచ్చాడు.
అక్కడితో ఆగిపోలేదు. మిగిలిన డబ్బు, సగం నిర్మించి ఆగిపోయిన తమ ఇంటి పని పూర్తి చేయడానికి తాపత్రయపడుతున్న అమ్మనాన్నలకు ఇచ్చేశాడు.
ఇంకా కోడింగ్, ఆధునిక సాఫ్ట్‌వేర్ తయారీ నేర్చుకుని, భవిష్యత్తులో మరిన్ని యాప్‌లు తయారుచేసి తమ ఇంటిని పూర్తిగా నిర్మించడమే ఈ చిన్నారి ఆశయం.
తల్లిదండ్రుల కష్టం విలువ తెలిసి, తాను వచ్చిన దారిని మరచిపోని ఇలాంటి గుణవంతులైన పిల్లలు దేశానికి దక్కిన గొప్ప వరం. 
మన దేశంలో ప్రతిభ ఉన్న ఇటువంటి పిల్లలకు సరైన మార్గదర్శకత్వం, సాంకేతిక విద్య అందుబాటులోకి వస్తే ప్రపంచాన్ని గెలిచే భవిష్యత్ తరాలను తయారుచేయవచ్చు.
ఆదర్శంగా నిలిచిన ఈ చిన్నారి ప్రతిభావంతుడికి మన ఆశీస్సులు, శుభాకాంక్షలు తెలుపుదాం... ఏమంటారు?