వర్షం కురిసిన వేళ: - - యామిజాల జగదీశ్

 

వర్షం కురిసిన తర్వాత బృందావన అడవి పచ్చటి సొగసుతో, కొత్త అందాలతో వికసించింది. కదంబ వృక్షం తళతళలాడే ఆకులపై పెద్ద పెద్ద వాన చినుకులు నిలిచి, మెల్లగా నేలమీదికి జారుతున్నాయి. బాలకృష్ణుడు ఆ చెట్టు కింద నిలబడి, ఆకుల నుంచి పడుతున్న చినుకులతో దాహం తీర్చుకుంటున్న తరుణం.
ఏదైనా ఒక చినుకు ముఖానికి దగ్గరగా రాగానే, చిన్నారి కృష్ణుడు చిలిపిగా నాలుక చాచి దాన్ని అందుకోవాలని చూస్తూ చిందించే నవ్వుల తీరును వర్ణించడానికి మాటలు చాలవు. చుట్టూ పచ్చటి గడ్డి, రంగురంగుల పూలు, చిన్నగా పారే ఏరు, ప్రశాంతంగా మేస్తున్న మేకలు, ఆవులు ఆ దృశ్యాన్ని మరింత మనోహరంగా మార్చేశాయి. ఈ ముద్దుల కృష్ణుడి బాల్య క్రీడతో అడవంతా సంతోషంతో నిండిపోయింది.