మిత్రుల కొరత: - - యామిజాల జగదీశ్

 'మిత్రుల కొరత' - దీని గురించి ఆలోచించాల్సిన సమయం వచ్చేసింది!
ఈరోజు ప్రపంచాన్ని భయపెడుతున్న అతిపెద్ద సమస్యల్లో 'మిత్రుల కొరత' ఒకటి.
నమ్మడం కష్టంగా ఉన్నా ఇదే నిజం!
1960లో ఒక వ్యక్తికి సగటున 100 మంది అత్యంత ఆప్తమిత్రులు ఉండేవారు.
1990లో ఆ సంఖ్య 50కి తగ్గింది.
2020లో అది కేవలం 10కి పడిపోయింది.
ఇప్పుడు? ఒక నిజమైన మిత్రుడు దొరకడమే కష్టమైపోయింది. ఇటీవలి పరిశోధన ప్రకారం మన దేశంలో 12 శాతం మందికి మనసు విప్పి మాట్లాడటానికి ఒక్క మిత్రుడు కూడా లేడట. మనసు విప్పి మాట్లాడే మనుషులు తగ్గిపోయారు.
స్నేహం = జీవితానికి ఇన్సూరెన్స్. మంచి స్నేహితులు నిజంగా 'లైఫ్ ఇన్సూరెన్స్' లాంటివారు. ఎందుకంటే:
ఆరోగ్యానికి మంచిది : మిత్రులు లేని ఒంటరితనం, రోజుకు 20 సిగరెట్లు తాగడంతో సమానమని పరిశోధనలు చెబుతున్నాయి. మానసిక ఒత్తిడి, కుంగుబాటు వాళ్ళను చుట్టుముడతాయి.
గుండెకు ధైర్యం : మంచి స్నేహితులు ఉన్నవాళ్లకు రక్తపోటు, గుండె జబ్బులు వచ్చే అవకాశాలు చాలా తక్కువ.
చురుకైన జీవితం : మిత్రులతో ఉంటే సంతోషంగా ఉంటుంది. కలిసి వ్యాయామం చేయడం, ఆటలాడటం, కొత్త విషయాలు ప్రారంభించడం సులువవు తుంది. వాళ్ళ తోడు మనలో రోగనిరోధక శక్తిని పెంచుతుంది.
స్నేహం ఇన్ స్టంట్ నూడుల్స్ కాదు. స్నేహం తానంతట తాను ఏర్పడదు. దానికి 'సమయం' అనే అతిపెద్ద పెట్టుబడి కావాలి.
మానసిక నిపుణుల అంచనా ప్రకారం ఒక వ్యక్తితో పరిచయం పెరగడానికి కనీసం 40 గంటలు కలిసి ఉండాలి. అది ఒక రకమైన స్నేహంగా మార డానికి ఇంకో 90 గంటలు కావాలి.
'పాణస్నేహితుడు' అనే స్థాయికి రావడానికి మరో 40 గంటలు పడుతుంది. మొత్తం దాదాపు 170 గంటలు! ఈ పరుగుల జీవితంలో మన దగ్గర అంత సమయం ఉందా?
ఒకసారి మంచి స్నేహం ఏర్పడిన తర్వాత దాన్ని నిలబెట్టుకోవడానికి కూడా ప్రతిరోజూ కాస్త సమయం కేటాయించాలి. మొక్కకు నీళ్ళు పోసినట్లు, స్నేహానికి 'మాటలు' అనే నీరు అవసరం.
ఇది స్నేహమేనా? ఒకసారి ఆలోచించండి :
ఆఫీస్ స్నేహాలు : మనం 'స్నేహం' అనుకునేది చాలావరకు అవసరం కోసమే, పైన చెప్పుకునే శుభాకాంక్షలే.
సోషల్ మీడియా స్నేహాలు : ఫేస్‌బుక్‌లో 5000 మంది మిత్రులు, వాట్సాప్‌లో 100 మంది గ్రూపులు ఉన్నా, కష్టాల్లో సాయం చేయడానికి ఎవరూ ఉండరు. ఇవి కేవలం 'కాలక్షేపం' ముచ్చట్లే.
బార్ & రెస్టారెంట్ స్నేహాలు : గ్లాస్ ఖాళీ అయ్యేంతవరకే ఆ మాటలు, నవ్వులు. మత్తు దిగితే మనుషులు కనిపించరు.
అసలు సమస్య ఎక్కడ ఉంది?
స్నేహ బంధాలు ఎందుకు తెగిపోతున్నాయంటే కారణాలు చాలా ఉన్నాయి. సాంకేతికత, చిన్న కుటుంబాలు, పోటీ ప్రపంచం... కానీ అన్నింటికంటే పెద్ద కారణం ఒక్కటే.
“సమయం లేదు నేస్తమా!”
డబ్బు సంపాదించే యంత్రాల్లా మారిపోయాం. సంబంధాలను నిలబెట్టుకోవడం మర్చిపోయాం.
ఇప్పటికైనా మేల్కొనండి :
సమయం కేటాయించండి : రోజులో కనీసం 15 నిమిషాలైనా స్నేహితులకు ఫోన్ చేసి మాట్లాడండి. వారంలో ఒక్కసారైనా కలవండి.
నాణ్యమైన సమయం ఇవ్వండి : కలిసినప్పుడు ఫోన్ పక్కన పెట్టి మనసు విప్పి మాట్లాడండి.
కొత్త స్నేహాలను ఆహ్వానించండి : వాకింగ్ వెళ్ళినప్పుడు, కొత్త క్లాసుల్లో చేరినప్పుడు తోటి మనుషులతో మాటలు కలపండి.
ఉన్న స్నేహాలను కాపాడుకోండి : చిన్న చిన్న కోపాల కోసం వేలకట్టలేని స్నేహాన్ని వదులుకోవద్దు. 'సారీ', 'ధన్యవాదాలు' చెప్పడానికి వెనకాడకండి.
గుర్తుంచుకోండి, చివరి శ్వాస వరకు మనతో వచ్చేది బ్యాంక్ బ్యాలెన్స్ కాదు, మంచి స్నేహితులు మాత్రమే.
కాబట్టి ఈనాటి నుంచే ప్రారంభించండి. మీ ఫోన్ కాంటాక్ట్ జాబితా తిరగేయండి. చాలా రోజులుగా మాట్లాడని ఆ 'బెస్ట్ ఫ్రెండ్'కు ఒక మెసేజ్ పెట్టండి.
స్నేహాన్ని కాపాడుకుందాం. మనల్ని మనమే కాపాడుకుందాం. ఏమంటారు?