పూలు రెండు పరిమళం ఒక్కటే : - డా.టి.రాధాకృష్ణమాచార్యులు-9849305871

తరాలుగా పూస్తున్న తోటలో

పూలు రెండు పరిమళం ఒకటే

రంగు రుచి వాసనలో లేదు తేడా

ప్రకృతి వర కరుణల సంగీత సంగమం

ఆకాశంలో హరివిల్లు 

ఇంట్లో ఇంద్రధనుసు సహజంగా

స్థలకాలాలు వేరువేరు నిజంగా

ఆత్మీయ అంతరంగాల భాష ఒకటే

చదువు లోకంలో  ముచ్చట

ఒకటి అందమైన గాధాసప్తశతిపైన జీవకవిత

మరొకటి గంతులేసే పంచామృత ధార భవిత

ఒకటి బోధన,మరొకటి అభ్యాస సాధన

కలలు,కళలు ఆ కనులదాటి మనలేవు 

ఆ బంధం నింగీనేల మధుర అభివ్యక్తి

అక్కడ ఎవరిమాట చెల్లియో చెల్లకో  

తరంగాల తరతరాల డిసిప్లిన్ 

అది వీచే వాసన తోటగాలి లెగసీ...