సహాయం (ట ఒత్తుతో... ): - వరలక్ష్మి యనమండ్ర

చెరువు కట్ట పైన

చెట్టొకటి ఉన్నాది

చెట్టు కొమ్మ పైన

పిట్టొక్కటి ఉన్నాది //చెరువు//

పుల్ల పుడకా దెచ్చి

గూడొకటి కట్టింది

గూటిలోన పిట్ట

గుడ్లను పెట్టింది//పు//

చెర్వు కట్టమీద

చీమొక్కటి ఉన్నది

కాలుజారి చీమ

నీటిలోన పడ్డాది //చె//

చెట్టు మీద పిట్ట

చీమను చూసింది

చెట్టు ఆకు ఒకటి

నీటిలో వేసింది//చె//

ఆకును పట్టి చీమ

గట్టుకు చేరింది

పిట్టకు ధన్యవాదములు

చెప్పింది//చెరువు//

చిట్టీ చిట్టీ చెల్లెమ్మ

ట ఒత్తు నీకు తెలిసిందా

కిట్టూ, బిట్టూ రారండీ

కథలో నీతి తెలిసిందా