శ్రీకృష్ణా!:- పద్మ త్రిపురారి.-జనగామ.

పల్లవి::

చల్లని మనసు 

పిల్లన గ్రోవి 

నల్లనివాడా! శ్రీకృష్ణా!

అల్లన మెల్లన 

పల్లెను చేరి 

అల్లరి చేసే యదు కృష్ణా!

        

        "చల్లని"

చరణం::

మోమున నగవు 

నుదుటన తిలకం 

అందము చిందే శ్రీకృష్ణా!

వెన్నలు దోచి 

వన్నెలు చూపిన 

సుందర వదనా 

యదు కృష్ణా!

      "చల్లని"

చరణం::

వసుదేవకి నందన

నందము మాకిడ 

అందాలొలుకుతు రావయ్యా!

యశోద నందన 

వందననమిడుదుము 

అందెళ రవళితో రావయ్యా.

   "చల్లని"

చరణం::

బృందావనిలో హృదయము నిండగ 

వేణువులూదిన శ్రీకృష్ణా!

నీకై వేచిన రాధా గోపిక 

ఎదను చేరిన యదు కృష్ణా!

సత్యా రుక్మిణి 

ప్రేమకు రూపం 

నీవై వెలిగిన శ్రీకృష్ణా!

ఇష్ట సఖుడవై 

కుచేలుని కష్టము 

దూరము చేసిన యదు కృష్ణా!

చరణం::

దుష్ట కంసుని శిరమును తెంపి 

ధీరత చాటిన శ్రీకృష్ణా!

కాళీయ మర్ధన!

గిరిధారివై నీవై 

గోవుల కాచిన యదు కృష్ణా!

గోపబాలకుల ప్రియ నేస్తము నీవై 

జగములనేలిన యదు కృష్ణా!

చక్రధారివై విశ్వము నిండిన 

వేలుపు నీవే యదుకృష్ణా!

     "చల్లని"