వాలుకుర్చీ.: - పాలగుమ్మి జ్యోతి.

దర్జాగా దర్పంగా తాతయ్యని మోస్తూ..

ఆయన ఊగుతూ ఉంటే రాగాలాపన చేస్తూ..

ఎన్నో సమస్యలను వింది! 

సంతోష వార్తలూ వింది!

తాతయ్యను పెళ్ళి పెద్దగా చేసి..

ఊళ్ళో ఆడపడుచుల  సంబంధాలు కుదిరిస్తే వింది!

తానూ ఆ మాటల్లో పాలుపంచుకుంది!

సమస్యలను పరిష్కరిస్తూ. 

సంతోషంలో భాగమవుతూ.. 

అరుగు మీద  నిండుదనం తెస్తూ..

ఇంటికే హుందాతనం ఇస్తూ..

పాలేరులతో పంటలకు వేసే ఎరువులు!

ఆ ఏడు దిగుబడులకు తీసుకోవలసిన జాగ్రత్తలు! 

మనవళ్ళతో తాతయ్య ఆడిన ఆటలు!

దళారీలతో ధాన్యానికి చేసిన బేరసారాలు! 

 

ఎప్పుడూ.. తాతయ్యను అంటిపెట్టుకున్న నేస్తం!

తాతయ్య పార్థివదేహం చూచి మూగగా రోదించిన వైనం!

ఆ దర్జా... ఆ తేజస్సు కొరవడి అయ్యింది  నిస్తేజం!

మునుపటి వైభవం కోల్పోయింది!

తాతయ్య వాలుకుర్చీ మూగబోయింది!!