ఎన్ ఊరు: - - యామిజాల జగదీశ్

 వయనాడ్‌లో ఇలాంటి వూరు ఉందనే విషయం చాలా మందికి తెలియదు… కానీ లోపలికి వెళితే, మన తాత-బామ్మల కాలం నాటి జీవితాన్ని గుర్తు చేసే ఎన్నో విషయాలను చూడవచ్చు! 
కేరళలోని వయనాడ్ జిల్లాలో ఒక కొండ వాలు మీద దాదాపు 25 ఎకరాల విస్తీర్ణంలో 'ఎన్ వూరు' అనే ట్రైబల్ హెరిటేజ్ విలేజ్ ఉంది.
పేరులోనే ఒక చక్కని అర్థం ఉంది — “ఎన్ వూరు”. అంటే నా ఊరు అని అర్థం.
ఇది ఒక సాధారణ పర్యాటక ప్రదేశం కాదు. వయనాడ్‌లో నివసించే గిరిజన ప్రజల సాంప్రదాయం, జీవన విధానం, తిండి, చేతిపనులు, సంస్కృతిని ప్రజలు నేరుగా ఏర్పాటు చేసుకున్న ప్రాంతం.
లోపలికి నడుచుకుంటూ వెళితే, నగర జీవితంలో మనం మరిచిపోయిన ఒక రకమైన ప్రశాంతత కనిపిస్తుంది. సాంప్రదాయ గుడిసెలు, ఇరుకైన దారులు, చుట్టూ కొండలు... అన్నీ ఒక పాత గ్రామంలో నడుచుకుంటూ వెళుతున్నట్లు ఉంటాయి.
కానీ ఇక్కడ ఉన్న ప్రతి గుడిసె వెనుక ఒక కథ ఉంది. వయనాడ్ గిరిజన సమాజాల సాంప్రదాయ జీవన విధా నం కేవలం ప్రదర్శనకు పెట్టకుండా, వారి సంస్కృతిని, జ్ఞానాన్ని ప్రజల దగ్గ రకు చేర్చడమే దీని ప్రధాన ఉద్దేశం.
అందులోనూ భోజనం ఒక ప్రత్యేక అనుభవం. ఇక్కడ గిరిజన సాంప్రదాయ వంటకాలను రుచి చూడగలిగే హోటళ్లు కూడా ఉన్నాయి. మన వూరిలో దొరికే సాధారణ హోటల్ తిండికి, ఇక్కడి సాంప్రదాయ తిండికి చాలా తేడా ఉంటుంది.
అలాగే గిరిజన ప్రజలు తయారుచేసే చేతివృత్తి వస్తువులు, మసాలా దినుసులు, జ్ఞాపకార్థ వస్తువులు కొనుగోలు చేయడానికి మార్కెట్ కూడా ఇక్కడ ఉంది. అందువల్ల మనం ఒక వస్తువును కొన్నప్పుడు, అది కేవలం ఒక జ్ఞాపికగా కాకుండా ఆ సమాజపు శ్రమకు నేరుగా అండగా నిలుస్తుంది.
ఇక్కడ సాంప్రదాయ కళా ప్రదర్శ నలను కూడా చూడవచ్చు. ట్రైబల్ ఫుడ్ ఫెస్ట్, ఆర్ట్ ఫెస్ట్ వంటి కార్యక్ర మాలు కూడా జరుగుతాయి. దాదాపు 300 మంది కూర్చోవడానికి వీలైన ఓపెన్-ఎయిర్ థియేటర్ కూడా ఇక్కడ ఏర్పాటు చేయబడింది.
ఈ ప్రదేశంలో మరో ముఖ్యమైన విషయం ఏమిటో తెలుసా?
'ఎన్ వూరు' గిరిజన ప్రజల జీవితాలను పర్యాటకులకు చూపించడానికి మాత్రమే రూపుదిద్దుకున్న చోటు కాదు. వారికి ఉపాధి అవకాశాలను కల్పించడం కూడా దీని ప్రధాన ఉద్దేశాలలో ఒకటి.
తిండి, చేతిపనులు, కళ, మార్కెట్ ఇలా అనేక సాంప్రదాయ మార్గాల ద్వారా గిరిజన సమాజాల వారినే ఇందులో భాగస్వాములను చేసి, వారి జ్ఞానానికి, నైపుణ్యానికి ఒక మార్కెట్ వేదిక సృష్టించబడుతోంది.
అందుకే ఇక్కడ ఒక పర్యాటకునిగా మనం నడుచుకుంటూ చూసేటప్పుడు, “ఎంత అందమైన ప్రదేశం!” అని మాత్రమే చూడకుండా… “ఈ జీవన విధానం మనం ఎంత దూరం కోల్పోయాం?” అని కూడా ఆలోచింపజేస్తుంది.
నగరంలో మనం రోజూ చూస్తే ఇళ్లు, రోడ్లు, దుకాణాలు అన్నింటి మధ్య పెరిగిన మనకు… ఇలాంటి ప్రదేశంలోకి కొన్ని గంటలు నడవడం ఒక విభిన్న అనుభవం.
వయనాడ్ వెళ్లేటప్పుడు కొండలు, జలపాతాలు, వ్యూపాయింట్లు అని మాత్రమే కాకుండా, అక్కడి ప్రజల జీవితాలను కూడా కొద్దిగా తెలుసుకోవాలని భావించేవారికి 'ఎన్ వూరు' ఒక మంచి ప్రదేశంగా ఉంటుంది.