స్వర్గాన్నే మేం సృష్టిస్తాం! (గ-ఒత్తుతో బాలగేయం): - వరలక్ష్మి యనమండ్ర

ఇప్పుడు మేం పసిమొగ్గలం!

అమ్మఒడిలో పాలబుగ్గలం!

ప్రేమ, మమతలకు ఉగ్గులం!

తెలివికి తీసిన నిగ్గులం!

 //ఇప్పుడు మేం//

పడతాం మేము చదువుల మార్గం!

కడతాం మేమొక సుందర దుర్గం!

మాదొక ఉత్తమ పౌరుల వర్గం!

చేస్తాం దేశాన్ని భూతల స్వర్గం!

 //ఇప్పుడు మేం//

తగ్గి ఉండటం మాకిష్టం!

తలొగ్గి బ్రతకడం మాక్కష్టం!

దగ్గరకొస్తే శత్రువులపై

అగ్గిపిడుగులను కురిపిస్తాం!

 //ఇప్పుడు మేం//

సిగ్గు, బిడియం కలిగినవారం!

దగ్గర, దూరం తెలిసినవారం!

ఉగ్గుపాలతో భక్తిని నేర్చాం!

నిగ్గదీసే వాక్శక్తిని పొందాం! 

//ఇప్పుడు మేం//

మగ్గే దాస్యం మాకొద్దు!

బుగ్గన లాస్యం కద ముద్దు!

దిగ్గజాలమై అడుగేస్తాం!

స్వర్గాన్నే భువిలో సృష్టిస్తాం! 

//ఇప్పుడు మేం//