బాలా త్రిపుర సుందరి. (కందములు ): - టి. వి. యెల్. గాయత్రి.-\పూణే. మహారాష్ట్ర.

బాలా త్రిపురాంబికవై 

శూలిని వరియించి తీవు శోభన మూర్తీ!

శ్రీలను కురిపించి ధరను 

పాలన జేసెడి జననివి వందనమమ్మా!//

నిండగు రూపముతో చని 

భండుని పుత్రుల దునిమిన పర్వత పుత్రీ!

అండగ నుందువు జనులకు 

దండము చేయుచు భజింతు దయగల తల్లీ!//

శంకరుని కై వెడలి యా 

వంకన తపమును సలిపిన పావన చరితా!

జంకును తొలగించు శుభద!

కింకరినై కొల్తు నిన్ను కృపగొనవమ్మా!

వేదన కల్గగ వేగమె 

నీదరి చేరితి పలుకుచు నీనామములన్ 

గాదనకమ్మా!బాలా!

పాదములే దిక్కు నాకు ప్రణతులు గొనుమా!//