శ్రీ విష్ణు సహస్రనామాలు (బాల పంచపది )- ఎం. వి. ఉమాదేవి

191)హంసః -

నేనుతానే అయినట్టివాడు

యోగి విశేషమై యున్నవాడు

తనలోనే నేనున్నట్టి వాడు

స్వామియై రక్షించగలవాడు 

శ్రీ విష్ణు సహస్రనామాలు!ఉమా!

192)సుపర్ణః -

అందమైన రెక్కలున్నట్టివాడు

తామరతీగలాయుండువాడు

పక్షిరాజయినట్టి గరుత్మంతుడు 

పాలపిట్టవలే అందమైనవాడు 

శ్రీ విష్ణు సహస్రనామాలు ఉమా!

193)భుజగోత్తమః -

భుజంగాలలో శ్రేష్ఠుడైనవాడు

సర్పసమూహం నాయకుడైనవాడు

సుగుణమణి యైనట్టివాడు

సర్పశ్రేణియే గొలుచుచున్నవాడు

శ్రీ విష్ణు సహస్ర నామాలు ఉమా!

194)హిరణ్యగర్భః -

బంగారపు బొడ్డుగలవాడు 

తామర నాభియందున్నవాడు 

బ్రహ్మకు పుట్టుకనిచ్చినవాడు 

సర్వోత్తమమైనట్టి వాడు 

శ్రీ విష్ణు సహస్ర నామాలు ఉమా!

195)సుతపాః -

చక్కగా తపస్సుజేయునట్టివాడు

ధ్యానమగ్నుడై యుండెడివాడు

తపోధనుడై భాసిల్లువాడు

తాపసుల మార్గదర్శియైనవాడు

శ్రీ విష్ణు సహస్రనామాలు ఉమా!

(సశేషం )