శ్రీ మాల్యాద్రి నారసింహ శతకము.;- టి. వి. యెల్. గాయత్రి.-పూణే. మహారాష్ట్ర.

 తేటగీతి పద్యములు.
--------------------------
6.
సోమకాసురు మర్దించి సురల గాచి 
వేదరాశిని ముదమున విధికి జేర్చి 
మీనరూపము దాల్చిన మేటి నీవె 
నన్ను పాలింపు మాల్యాద్రి నారసింహ!//
7.
మందరంబెత్తి నిల్పగ మహిమ తోడ 
కమఠరూపము దాల్చిన కమల నయన 
పొగడ తరమౌన నిన్నిట పూజ నీయ 
నన్ను పాలింపు మాల్యాద్రి నారసింహ!//
8.
యజ్ఞవారాహమై నీవె నవతరించి 
కాశ్యపేయుని దునుమాడి కడిమిజూపి 
ధరణి జేపట్టి కాచిన దైవమీవు 
నన్ను పాలింపు మాల్యాద్రి నారసింహ!//
9.
బలుడగు హిరణ్య కశ్యపున్ బట్టినీవు
సంహరించగ వచ్చితే స్తంభమందు
దైత్యు ప్రహ్లాదు కాపాడు దైవమీవె!
నన్ను పాలింపు మాల్యాద్రి నారసింహ!//
10.
వామనుండవై యరుదెంచి వాసిగాను
చుట్టు కొల్చితే విశ్వమున్ జూపిమహిమ!
విక్రముడవై సురల గాచు విభుడ వయ్య!
నన్ను పాలింపు మాల్యాద్రి నారసింహ!//