శ్రీ మాల్యాద్రి నారసింహ శతకము.;- టి. వి. యెల్. గాయత్రి.పూణే. మహారాష్ట్ర

(తేటగీతి పద్యములు.)

తల్లిదండ్రులు నీవె నా దాత నీవె 

బంధు మిత్రుడ వీవె నా భ్రాత వీవె 

కలిమి బలిమియు నీవయ్య కమల నయన 

నన్ను పాలింపు మాల్యాద్రి నార సింహ!//

ఓ న మాలను నేర్పెడి నొజ్జ వీవె 

చదువు నేర్వగ నీచెంత చనువు తోడ 

వచ్చి పట్టితి నీ పాద పద్మయుగము

నన్ను పాలింపు మాల్యాద్రి నారసింహ!//

గొల్ల పల్లెను దిరిగిన గోప బాల 

మనసు దోఁచెడి దొంగవే మాయజేసి 

పట్టు చిక్కని నీజాడ బయలు పరచి 

నన్ను పాలింపు మాల్యాద్రి నారసింహ!//

జగతి నెల్ల నీమాయల జాల మందు 

ద్రిప్పు చుందువు నీ లీల తెలియలేము 

వింత నాటక మాడెడి విధివి నీవె 

నన్ను పాలింపు మాల్యాద్రి నారసింహ!//

రాజ్య మంతయు వీడిన రాజు వీవె 

నీవు చూపెడి మార్గమే నిశ్చయముగ

ననుసరింతు నోదేవ!నీ యానతులను!

నన్ను పాలింపు మాల్యాద్రి నారసింహ!//