వాంగోని మరచిపోలేరు:- - యామిజాల జగదీశ్

 135 సంవత్సరాల క్రితం విశ్వవిఖ్యాత చిత్రకారుడు విన్సెంట్ వాంగో ఫ్రాన్స్‌లోని ఆవర్స్ - సర్ - ఓయిస్ గ్రామంలో తుపాకీతో కాల్చుకుని మరణించాడు. ఆయనకు 37 సంవత్సరాలు. ఇప్పటికీ ఆయనెందుకు కార్చుకున్నాడు అనేది పెద్దగా తెలియదు. తరువాతి రోజుల్లో, ఆయన సోదరుడు థియో ఒక వాక్యాన్ని రాశాడు : "అతన్ని మరచిపోలేరు." 
అతను అప్పుడు లేడు, ఇప్పుడు కూడా లేడు. ప్రతి సంవత్సరం, 1,00,000 కంటే ఎక్కువ మంది సందర్శకులు ఆవర్స్‌కు వెళతారు. ఇద్దరు సోదరులను పక్కపక్కనే ఖననం చేసిన సమాధి ముందు నిలబడతారు. వారిని ఆకర్షించేది కేవలం ఒక జీవిత చరిత్ర మాత్రమే కాదు, అత్యవసరంగా, సన్నిహితంగా, లోతుగా మానవీయంగా ఉన్న ఒక కళాకారుడి శాశ్వత ఉనికి.
ఒకప్పుడు ఎవరూ పట్టించుకోని వాంగో ఇప్పుడు మనందరికీ చెందినవాడు.
విన్సెంట్ వాంగో గురించి కొన్ని  వాస్తవాలు చూద్దాం...
విన్సెంట్ వాంగో కళా ప్రపంచంలో అత్యంత ప్రసిద్ధ చిత్రకారులలో ఒకరైనప్పటికీ, ఆయన 'హింసింపబడిన కళాకారుడు' అనే పదానికి పర్యాయపదంగా కూడా మిగిలారు.
విన్సెంట్ వాంగో మరణించినప్పుడు ఆయన వయస్సు కేవలం 37 సంవత్సరాలు. అపచపటికి ఒకే ఒక్క పెయింటింగ్ అమ్ముడుపోయింది. అతని పెయింటింగులు ఇప్పుడు ప్రపంచంలోనే అత్యంత ఖరీదైనవిగా ఉన్నాయి.
ఆయన 10 సంవత్సరాల వ్యవధిలో దాదాపు 900 చిత్రాలను గీశాడు.
27 ఏళ్లు వచ్చే వరకు, ఆయన అనేక విభిన్న ఉద్యోగాలను అన్వేషించాడు. ఆయన ఓ ఉపాధ్యాయుడు. కళాకారుడు.
అకస్మాత్తుగా, ఆయన ఈ వృత్తులను విడిచిపెట్టి, తన శక్తినంతా పెయింటింగ్, డ్రాయింగ్‌పై కేంద్రీకరించాలని నిర్ణయించుకున్నారు. ఆయన ఏదైనా చిత్రం గీయడం  ప్రారంభించారంటే ఆయనను ఆపడానికి ఎవరూ లేరు!
తరువాతి పదేళ్లలో, వాంగో దాదాపు 900 పెయింటింగులు వేశారు. అంత తక్కువ సమయంలో ఎంతో సాధించారనేది చూస్తే మనసు చలించిపోతుంది.
వాంగో జీవితాంతం మానసిక అనారోగ్యంతో జీవించారు. ఇది అందరికీ తెలిసిన విషయమే అయినప్పటికీ, ఏ మేరకు అనేది ఎవరూ 100 శాతం ఖచ్చితంగా చెప్పలేరు. అయితే బాగా అర్థం చేసుకోగలిగిన విషయం ఏమిటంటే, ఆయన లక్షణాలలో భ్రాంతులు, నిరాశ, నిస్పృహలూ ఉండేవి. ఇవి కొన్నిసార్లు మరీ తీవ్రంగా ఉండేవి. చాలా మంది వైద్యులు ఆయన  అనారోగ్యాన్ని నిర్ధారించడానికి ప్రయత్నించారు. స్కిజోఫ్రెనియా, బైపోలార్ డిజార్డర్, సిఫిలిస్, హైపర్‌గ్రాఫియా, గెష్‌విండ్ సిండ్రోమ్, టెంపోరల్ లోబ్ ఎపిలెప్సీ వంటి రోగాలతో బాధపడ్డారంటారు. రోగ నిర్ధారణ ఏమైనప్పటికీ, అది ఆయన జీవనశైలి వల్ల మరింత దిగజారి ఉండవచ్చనీ చెప్పే వారున్నారు. నిజం చెప్పాలంటే ఇలాంటిది ఎవరికీ ఆరోగ్యకరమైనది కాదు.
ఆయనకు విశేష నేపథ్యం ఉన్నప్పటికీ, తన జీవితాన్ని పేదరికంలో గడిపారు. సాదాసీది ఆహారంతోనే జీవించారు. ఆయన ఆహారంలో ప్రధానంగా బ్రెడ్, కాఫీ తప్పనిసరి. ఆయన అధికంగా మద్యం తాగేవాడు. అలాగే చేతిలో పైపు లేకుండా కనిపించే వారూ కాదు.
ఆయన సోదరుడు తరచుగా ఆయన లక్ష్యానికి ఎంతగానో సహాయం చేశారు. కానీ వాంగో తన కళపై మక్కువతో, అన్ని నిధులను మరింత సృజనాత్మక సామాగ్రిని కొనుగోలు చేయడానికి వినియోగించాలని ఎంచుకున్నాడు.
33 సంవత్సరాల వయసు వచ్చేసరికి, వాంగో ఆరోగ్యం మరింత క్షీణించింది. అతను తన సోదరుడు థియోకు ఒక సంవత్సరంలో ఆరుసార్లు మాత్రమే వేడి భోజనం చేశాడని, అతని దంతాలు వదులుగా, బాధాకరంగా ఉన్నట్లు అనిపించిందని రాశాడు.
ఆయన సరైన ఆహారం తీసుకోకపోవడంవల్ల, పొగ త్రాగడంవల్ల క్రమం తప్పకుండా అనారోగ్యంతో ఉండటంలో ఆశ్చర్యం లేదు. ఆయనకు 'ది రెడ్ హెడ్డ్ మ్యాన్' అనే మారుపేరు పెట్టారు. 
వాంగో మానసిక ఆరోగ్యం తరచుగా దిగజారుతూ ఉండేది. ఆయన ఆసుపత్రిలోపల, వెలుపల చాలా సమయం గడిపాడు. సంవత్సరాలు గడిచేకొద్దీ, ఆయన అనుభవించిన బాధలు తీవ్రమైనవే. 
ఆయన ప్రవర్తనకు భయపడి, కొందరు అతనికి "లె ఫౌ రౌక్స్" (ఎర్రటి తలల పిచ్చివాడు) అని పేరు పెట్టారు.  అతనికి వ్యతిరేకంగా పిటిషన్ (ఆర్లెస్ పిటిషన్) కోసం సంతకాలను సేకరించడానికి కలిసి ర్యాలీ చేశారు. దీనికి ప్రతిస్పందనగా, పోలీసులు వాంగోను ఆయన ఇంటి నుండి శాశ్వతంగా వెళ్లగొట్టారు. ఆయన మరోసారి ఆసుపత్రికి తిరిగి వచ్చాడు.
వాంగో తన చెవిని కోసుకున్నారన్నది అందరికీ తెలిసిందే. ఒకరోజు వాంగో తన స్నేహితుడు గౌగ్విన్ ని రేజరుతో బెదిరించే వరకు వాదన వేడెక్కింది. కానీ వాస్తవానికి గౌగ్విన్ కు హాని చేయకుండా వాంగో తన చెవిలో కొంత భాగాన్ని కోసుకున్నారు. దానిని ఒక గుడ్డలో చుట్టి, తరువాత దానిని ఒక వేశ్యకు ఇచ్చారు వాంగో. ఈ విషయమై తీవ్రస్థాయిలో విమర్శలు వచ్చాయి.
వాంగో చెవి  మొత్తం కోసుకున్నారని కొందరుంటారు. ఈ సంఘటన తర్వాత, వాంగో అప్పట్లో సెయింట్-పాల్-డి-మౌసోల్ ఆసుపత్రిలో చేరాలని నిర్ణయించుకున్నారు. అక్కడ ఆయనకు 'జనరలైజ్డ్ డెలిరియంతో కూడిన తీవ్రమైన ఉన్మాదం' ఉన్నట్లు నిర్ధారణ అయింది.
అదృష్టవశాత్తూ వాంగో ఆసుపత్రిలో ఉన్నప్పుడుకూడా తన కళను సృష్టించడం కొనసాగించాడు. అతను రోజుల తరబడి కిటికీల గుండా దృశ్యాలను చూస్తూ గడిపేవాడు. ఇక్కడే ఆయన తన అత్యంత ప్రసిద్ధమైన పెయింటింగ్ 'స్టార్రి నైట్'ని పూర్తి చేశాడు. ఆయన కూర్చుని వెలుతురు వాతావరణ మార్పులను గమనిస్తూ, సూర్యోదయం, చంద్రోదయం, ఎండతో నిండిన రోజులు, మేఘావృతమైన రోజులు, గాలులతో కూడిన రోజులు, వర్షపు రోజులలో దృశ్యాన్ని చిత్రించారు. ఇది ఒక కళాఖండంగా నమోదైంది. అయితే వాంగో దీంతో ఎప్పుడూ సంతోషంగా లేరు. 
మూడు సంవత్సరాల కాలంలో, వాంగో అందరినీ ఆకట్టుకునే 43 స్వీయచిత్రాలను చిత్రించారు.
37 సంవత్సరాల వయస్సులో, వాంగో ఆసుపత్రి నుండి డిశ్చార్జ్ అయ్యారు. ఆయన సోదరుడి దగ్గరయ్యారు.
కానీ అతని మానసిక ఆరోగ్యం క్షీణిస్తూ వచ్చింది.
1890 జూలై 29 వరకు పరిస్థితులు మరింత దిగజారుతూనే ఉన్నాయి. ఆ తర్వాత ఆయన తనను తాను ఛాతీలో కాల్చుకున్నారని తెలిసింది. బుల్లెట్ అతని ఛాతీ గుండా వెళ్లినా, అంతర్గత అవయవాలకు లేదా వెన్నెముకకు ఎటువంటి నష్టం వాటిల్లలేదు. కానీ వైద్యులు దానిని తొలగించలేకపోయారు. రెండు రోజుల తర్వాత ఆయన మరణించారు.
ఇది వాంగో కథకు ముగింపు అయినప్పటికీ, కొందరు ఆయన స్వయంగా బుల్లెట్ పేల్చలేదని, వాస్తవానికి ఆ కళాకారుడిని ఆటపట్టించిన స్థానిక యువకుడే అతన్ని చంపాడని అంటారు
మరణశయ్యపై ఉన్నప్పుడు, వాంగో తన సోదరుడికి చెప్పిన హృదయ విదారకమైన వీడ్కోలు మాటలు "దుఃఖం ఎప్పటికీ ఉంటుంది" అని.