వేణునాదం :- గుండ్లపల్లి రాజేంద్రప్రసాద్, భాగ్యనగరం.

నిశ్శబ్దం నిద్రలేస్తే —

వేణువే పలుకరిస్తుంది,

గాలిలో గాథలై

గుండెలను తడుపుతుంది.

చెవులలో దూరి

చెమ్మగాలై, పాటలై,

శ్రోతల మదుల్లో

శ్రావ్యమై మార్మోగుతుంది.

వేణునాదము తరంగమై

ప్రేమరాగాలు వెలువరిస్తుంది.

తనువుమరిచి తేలే తీయదనమై

తలపులై మనసులకెక్కి మత్తెక్కిస్తుంది.

పొదల్లో పుట్టిన మ్రోగు కర్ర —

దేవతల దివ్యనాదమయ్యింది.

గాలి స్పర్శతో గానం చేసే

ప్రకృతి ప్రాణమయ్యింది.

వేణువు — గాలికి ప్రాణం,

మనసుకు మధుర స్మరణం.

వేణునాదమే వసుధ హృదయధ్వని -

వేయిరాగాల వెన్నెలలోని సౌందర్యనిధి

వేణువు కృష్ణుని వాయిద్యం, హస్తభూషణం,

రాధకు ప్రియాతిప్రియం, ప్రేమకు చిహ్నం,

గోపికలకు ఆనందాల కారణం, మహిమాన్వితం,

గోవులకు సంతోషదాయకం, భక్తులకు పూజ్యనీయం