ప్రేమ… ఎక్కడ నీ చిరునామా?:- సయ్యద్ సల్మా-7981914217

పుష్పంలా వికసించే రెండు హృదయాల ఏకధ్వని ప్రేమ,

రెండు అక్షరాల పదం కాదు — జన్మజన్మల బంధం.

మమతతో నిర్మితమైన విశ్వాస సౌధం,

కుటుంబానికి భరోసా, జీవితానికి ఆధారం.

కాని ఈ కాలంలో ప్రేమ

ఆకర్షణకు మరొక పేరైంది.

రూపం మెరుపు, డబ్బు వెలుగు

మనసులను మాయలో ముంచుతున్నాయి.

ఈ రోజు ఒకరితో, రేపు మరొకరితో

పుస్తక పేజీలలా బంధాలు మారుతున్నాయి;

మాటలు తేలికవై,

వాగ్దానాలు కాలంతో కరిగిపోతున్నాయి.

ఒక క్షణిక మోహం కోసం

ఒక జీవిత బంధం విరిగిపోతోంది.

ఇప్పటికే ఉన్న కుటుంబం చీలిపోతోంది,

పిల్లల భవిష్యత్తు మౌనంగా మసకబారుతోంది.

ఇది ప్రేమ కాదు — స్వార్థం;

ఇది ధైర్యం కాదు — ద్రోహం.

ప్రేమ, పెళ్లి అనే పదాలే

భయాన్ని కలిగిస్తున్నాయి.

“కలకాలం నిలుస్తుందా?” అనే సందేహం

మంచి మనసులను వెనక్కు నెడుతోంది.

ఒంటరి జీవితాల నీడలో

నమ్మకం క్రమంగా కరుగుతోంది.

నిజమైన ప్రేమ

ఇతరుల గూడు కూల్చి నిలబడదు;

అది కాపాడుతుంది, నిర్మిస్తుంది.

అందమైన సంసారం కోరుకోవడం సరిపోదు,

దాన్ని నిలబెట్టడం బాధ్యత.

ప్రేమకై వచ్చిన హృదయాన్ని

ఆటగా కాదు — ఆత్మగా భావించు.

పెళ్లి ఒక వేడుక కాదు — ప్రతిజ్ఞ.

ఒక ప్రేమ, ఒక జీవిత భాగస్వామి

అనే విలువను మళ్లీ నిలబెట్టు.

ప్రేమ అంటే పవిత్రమైన మనసు అని

ఈ లోకానికి మళ్లీ చాటిచెప్పు;

నీ చిరునామా

చిరస్థాయిగా నిలిచేలా ఉంచు.

హామి: ఇది నా స్వీయ రచన