అక్షరీకరణం: - గుండ్లపల్లి రాజేంద్రప్రసాద్, భాగ్యనగరం.

చూచిన దృశ్యాలు —

కళ్ల అంచుల్లో ఆగక

మనసు గోడలపై చిత్రాలై నిలిచిపోతే,

వాటిని అక్షరాలుగా కట్టిపడేస్తాను.

తట్టిన ఆలోచనలు —

మెరుపుల్లా మెదిలి 

మాయమయ్యేలోపు

పదాల వలలో పట్టి కవితగా మలుస్తాను.

ఏర్పడిన భావాలు —

హృదయపు లోతుల్లో

నిశ్శబ్దంగా ఉప్పొంగి ఊపిరి కోరినప్పుడు 

వాగ్దేవి వాక్యాలుగా వెలువరిస్తాను.

ప్రకృతి అందాలు —

పూల పరిమళాలు, ఆకుల గుసగుసలు,

నదుల పారుదల, వాన చినుకుల చిరునవ్వులను —

అక్షరాల పూలమాలగా అర్థవంతంగా అలంకరిస్తాను.

విన్న విషయాలు —

ఆనంద జ్ఞాపకాలై 

మనసును తాకితే 

కవితా స్వరాలుగా మారుస్తాను.

మెరిసిన మెరుపులు —

ఆలోచనలకు వెలుగై, అక్షరాల్లో చమకించి,

మేఘాల గర్జనలు — వేదనల ఉగ్రస్వరమైతే

పుటలపైకి ఎక్కించి పలుకవనాలకి ప్రాణం పోస్తాను.

తేనె పలుకులు —

మాటల మాధుర్యమై, 

అక్షరాల నోట నిద్రపోతే,

కలంపట్టి కాగితాలపై గీసేస్తాను.

ప్రేమ బంధాలు — 

వలవేసి పట్టుకుంటే

శాశ్వత అర్థాలుగా మలచి

కవిత గుండెల్లో బిగిస్తాను.

వాగ్దేవి వాక్కులు —

నన్ను నడిపించే 

దివ్య దీపాలై 

అక్షరీకరణానికి ఆశీర్వాదమై నిలుస్తాయి.

ఇదే నా సాధన —

జీవితం తాకిన ప్రతి క్షణాన్ని అక్షరాలుగా మారుస్తూ, 

అనుభవాన్ని కవితలుగా చేసి

కాలానికి అర్పించటమే అక్షరీకరణం అని చాటుతాను.