శివశక్తి...అర్థనారీశ్వర తత్వం..!: - కవి రత్న-సాహిత్య ధీర-సహస్ర కవి భూషణ్-పోలయ్య కూకట్లపల్లి-అత్తాపూర్ హైదరాబాద్

శ్లోకం:

చాంపేయ గౌరార్ధ శరీరకాయై

కర్పూర గౌరార్ధ శరీరకాయ |

ధమ్మిల్లకాయై చ జటాధరాయ నమః 

శివాయై చ నమః శివాయ ||

శివుడు సగము...శక్తి సగము -

మేఘమున మెరుపు దాగియున్నట్లు...

జడలు కొన్ని...ముడులు కొన్ని -

నదిలో అలలు సుడులు తిరిగినట్లు...

నొసట కన్ను...నొసట తిలకము -

నిప్పులో వెన్నెల కాంతి కలిసినట్లు...

గరళమొకటి...అమృతమొకటి - 

సముద్రమున విషము సుధ పుట్టినట్లు...

పులితోలు ఒకటి...పట్టుచీర ఒకటి - 

బండరాయిపై పూలతీగ పాకినట్లు...

రుద్రాక్ష హారము...ముత్యాల హారము - 

మట్టిలో మాణిక్యము మెరిసినట్లు...

శ్మశానవాసము...కైలాసవాసము -

చీకటిలో వెలుగురేఖ ఉదయించినట్లు...

యోగము ఒకటి...భోగము ఒకటి - 

కాయలో తీపి పండినట్లు...

పురుష రూపము...ప్రకృతి రూపము - 

బీజమున వృక్షము దాగియున్నట్లు...

అద్వైతమూర్తి అర్ధనారీశ్వరుడు - 

ఆత్మలో పరమాత్మ లీనమైనట్లు...

భక్తులను బ్రోచే ఓ బోళా శంకరా...

సకల శుభములనొసగే ఓ సదాశివా... 

మీ నామం పరమ పావనం... 

మీ రూపం మాకు కార్తీకదీపం...

మీ చరణమే మాకు శరణము....

ఓం నమశ్శివాయ ఓం నమశ్శివాయ...

ఓం శంభో శంకర హర హర మహాదేవ...

శ్లోకం:

ప్రపంచ సృష్ట్యున్ముఖ లాస్యకాయై 

సమస్త సంహారక తాండవాయ |

జగజ్జనన్యై జగదేకపిత్రే నమః 

శివాయై చ నమః శివాయ ||

(అందరికీ మహా శివరాత్రి శుభాకాంక్షలు)