మారని మనిషి ఆరని ధనదాహం..!: కవి రత్న-సాహిత్య ధీర-సహస్ర కవి భూషణ్-పోలయ్య కూకట్లపల్లి-అత్తాపూర్, హైదరాబాద్

భాగం – 1 :

"ఎన్నికల ఎర”

ఈ కరెన్సీ కట్టలే కదా

చిట్టిపొట్టను నింపే

ఆపదలో ప్రాణాలు కాపాడే

ఆక్సిజన్ సిలిండర్‌లు…

ఈ ధనంతోనే కదా

ఎన్నికల్లో నాయకులు

ఓట్ల పంట కోసం

కోట్ల పెట్టుబడి పెట్టేది?

ఎన్నికల పొలంలో

విత్తనాల్లా చల్లేది...

మత్స్యకారుల్లా

అమాయకపు ఓట్ల

చేపలకు ఎర వేసేది...

బంగారు నగలిచ్చేది...

పట్టుచీరలు పంచేది...

ఆశల గాలం విసిరేది...

ఈ ధనమే కదా

నీ అధికారానికి

నీ అహంకారానికి

నీ అవినీతికి

నీ దాతృత్వానికి

నీ దైవత్వపు...

విగ్రహానికి పెట్టిన కిరీటం...

భాగం – 2 :

ధనం “మత్తులో మాయలో”

ఈ ధనం కోసమే కదా

వర్షం కోసం

ఎదురు చూసే రైతులా...

వసంతం కోసం

ఎదురు చూసే వనంలా...

నీవు పడిగాపులు కాసేది...

ఈ ధనమే కదా...

నిత్యం నీ వెంట నీడలా

తిరిగి నిన్ను ముద్దాడి

మురిపించే మాయలేడి...?

ఈ ధనమే కదా...

నీ కరెన్సీకట్టల సింహాసనం...

నీ తలపై కిక్కి తైతక్కలాడి

నిన్ను కోటీశ్వరున్ని చేసేది

కొండలపై కూర్చోబెట్టే కొలిచేది...

ఈ ధనమే కదా...

“నాది నాది” అనిపించి

ఎడారిలో ఎండమావిలా

నిన్ను మోసం చేసి నీవు

కన్నుమూసి కాటికెళ్లగానే

చేతిలోని ఇసుక రేణువులా

చేజారి మాయమై పోయేది...

ఈ ధనమే కదా...

గాలిపటంలా నీవు

విచ్చలవిడిగా తిరిగేవేళ

విలాసాలకు మరిగి విర్రవీగేవేళ

మంచుతుఫానులా ముంచెత్తేది

నిన్నొక దుష్టునిగా భ్రష్టునిగా ముద్రవేసేది..

భాగం...3

మారని మనిషి...ఆరని ధనదాహం..!

ఈ ధనమే కదా...

నిన్ను అప్పుల నిప్పుల్లో

కాల్చే అందమైన అగ్గిపుల్ల

నీ సద్గుణాన్ని దుర్గుణంగా మార్చే

పాలలో పడిన విషపు చుక్క…

నీవు దోచుకొని స్విస్ బ్యాంకుల్లో

మంచుకొండల్లో దాచిన రహస్యనిధి...

ఈ ధనమే కదా...

భూగోళం పట్టనంతగా ఆర్జించినా

వర్షంలో తడిసిన దీపంలా…

నీ ఆరోగ్యాన్ని కొనలేనిది...

నీ కిష్టమైన బిడ్డను కనలేనిది...

ఈ ధనమే కదా

మనిషిని మనీషిగా

దానవున్ని మాధవునిగా మార్చి

నిన్ను పరలోకానికి చేర్చే మంత్రశక్తి...

ఈ ధనమే కదా

నీ పతనానికి తొలిఅడుగు

నీ దుష్ట సంస్కృతికి విత్తనం

నీ దుఃఖానికి దూరపు బంధువు...

ఈ ధనమే కదా...

నీకు ఖండాంతర ఖ్యాతిని తెచ్చేది

నిన్ను ఆరని అఖండజ్యోతిగా నిలిపేది.