సుఖ జీవనానికి శుభ సందేశం: - కవిరత్న-సాహిత్య ధీర-సహస్ర కవి భూషణ్-- పోలయ్య కూకట్లపల్లి-అత్తాపూర్ హైదరాబాద్

ఓ మిత్రమా..! నీ పరుపు…

నీ పరువును గంగలో కలిపేలోపే

నీ బద్ధకాన్ని బద్దలు కొట్టు…

అలసత్వం అనే చీకటి దుప్పటి

నిన్ను నిశ్శబ్దంగా కప్పేస్తుంది జాగ్రత్త…!

రోజూ అద్దంలోకి తొంగిచూసే నీవు...

"నేను అందగాడినని…

"అందాల రాముడినని

"నందమూరి చందమామనని…”

"ముసిముసి నవ్వులతో మురిసేవు..!

ఓ మిత్రమా..!ఆ అద్దం వెనుక దాగిననిజం

నీ అంతరంగం అంధకారమయమని...

నీ మనసు…అరిషడ్వర్గాల అగ్నిగుండమని..!

కామ క్రోధ లోభ‌ మోహ 

మద మాత్సర్యాలు నిన్ను

నిశ్శబ్దంగా దగ్ధంచేసే నిప్పుకణాలని...

అవి రగలకముందే...నీ బుద్ధిని 

గంగాజలంతో శుద్ధి చేసుకోమని…!

ఓ మిత్రమా..! నీ అద్దం 

నీతో యుద్ధం చేయకముందే...

నీ నీడ నీతో విడిపోకముందే...

స్వార్థం...సోమరితనమనే...

సంకెళ్ల నుంచి బయటపడు…!

నిశీధి నీలోకి జారకముందే...

నిప్పుకణికై నిన్ను కాల్చకముందే...

వెన్నెల రేఖలా వెలుగులోకి వచ్చెయ్...

నీ ముందుజీవితాన్ని దీప్తిమంతం చేసుకో..!

ఓ మిత్రమా..!

కష్టాలు కత్తులై కోసినా...

కాలం గునపాలు గుచ్చినా...

కన్నీటి వరదలు ముంచెత్తినా...

భయపడకు…వెనుకడుగు వేయకు…!

నీ చెమట చుక్కలను

ముత్యాలుగా మార్చుకో...

నీ శ్రమను శిల్పంలా చెక్కి

రక్తం మరిగే సంకల్పంతో

నీ జీవితమనే బృహత్ గ్రంథంలో

విజయ గాథలను లిఖించుకో…!