ప్రపంచంలోనే అత్యంత ఎత్తైన శని విగ్రహం: - - యామిజాల జగదీశ్

 సహజ వాతావరణంలో ఆరుబయట నిలబడి ఉన్న ఈ శని విగ్రహాన్ని చూసే ముందు, మనకు మొదట కనిపించేది మహా గణపతి.
మనకు మొదట ఆయన వీపు కనిపిస్తుంది, అది సుమారు యాభై నాలుగు అడుగుల ఎత్తు ఉంటుంది. ఈ గణేశుని ప్రత్యేకత ఏమిటంటే, ఆయన వీపుపై 'రేపు రా' అనే మాటలు పెద్ద అక్షరాలతో వ్రాసి ఉంటాయి.
ఒకసారి, శని దేవుడు వినాయకుడిని పట్టుకోవడానికి వచ్చాడు. ఈ విషయం తెలుసుకున్న వినాయకుడు, తన వీపుపై 'రేపు రా' అని వ్రాసుకుని,  చూడమంటాడు. 
తన వీపుపై ఉన్న 'రేపు రా' అనే మాటలను చూసి, శని దేవుడు మరుసటి రోజు వచ్చాడు. 
ఆ మరుసటి రోజు కూడా, ఆయన 
ఆ మాటలను చదివి వెనుదిరిగాడు.
క్లుప్తంగా చెప్పాలంటే ఇది ఆ కథ, పురాణాల ప్రకారం, ఆ రోజు నుండి ఈ రోజు వరకు శని వినాయకుడిని పట్టుకోలేకపోయాడు.
ఈ మహా గణపతిని ప్రత్యేకంగా శుద్ధి చేసిన మట్టితో, వివిధ రకాల అరుదైన మూలికల సారాలతో తయారు చేశారు. ఈ పెద్ద గణపతిని "నవగ్రహ శాంతి గణపతి" అని కూడా పిలుస్తారు.
ఆయనను దర్శించుకోవాలంటే 27 మెట్లు ఎక్కాలి. మెట్లు ఎక్కే ముందు ఒక చిన్న శివలింగం ఉంది. భక్తులు తమ చేతులతో దానికి మంచి నూనెతో అభిషేకం చేయవచ్చు. దీని వల్ల మన పాపాలు తొలగిపోతాయి.
ఈ గణపతి ముందు, ప్రపంచంలోనే అత్యంత ఎత్తైన శనీశ్వర భగవానుడు ఇరవై ఏడు అడుగుల ఎత్తులో నిలబడి ఉన్న భంగిమలో దర్శనమిస్తాడు.
ఆయనను 'భక్తానుగ్రహ శ్రీ విశ్వరూప మహాశనీశ్వర' అని పిలుస్తారు. ఇది పంచలోహాలతో వెలిసిన విగ్రహం. పీఠంతో కలిపి ఆయన ఎత్తు ముప్పై మూడు అడుగులు. బంగారు వర్ణంలో ప్రకాశించే ఈ మహాశనీశ్వర, తన వాహనమైన కాకితో కాకుండా గరుడ పక్షితో ఉంటాడు. ఆగమంలో కూడా ఆయన వాహనం గరుడ పక్షి అని చెప్పబడింది.
ఆయన నాలుగు చేతులతో దర్శనమిస్తాడు. కుడి పైచేతిలో బాణం, ఎడమ చేతిలో ధనుస్సు పట్టుకుని ఉంటాడు. ఆయన కుడి, ఎడమ క్రింది చేతులు అభయం, వరదంతో అలంకరించబడి ఉంటాయి. ఆయన నిలబడిన పీఠంపై పన్నెండు రాశుల విగ్రహాలు చెక్కబడి ఉన్నాయి.
శని దోషం ఉన్నవారు ఆయనను పూజిస్తే, ఆయన అన్ని రకాల బాధలను తొలగిస్తాడని అంటారు.
రెండున్నర ఎకరాల విస్తీర్ణంలో విస్తరించి ఉన్న ఈ బహిరంగ ప్రాంగణంలో, నవగ్రహాలను వాటి వాటి దిశలలో, పదహారు అడుగుల ఎత్తైన (రాతి విగ్రహాలు) వాటి వాటి వాహనాలతో ప్రదర్శించారు. అంతేకాకుండా, ఆయా గ్రహాలకు చెందిన చెట్లు సమీపంలో ఉన్నాయి. ప్రతి విగ్రహం కింద ఒక శివలింగం ఉంది.
ఈ పవిత్ర స్థలాన్ని సూర్య ఉద్యానాలు అని పిలుస్తారు. ఈ ఉద్యానవనం చుట్టూ 108 చెట్లు ఉన్నాయి. వాటిలో 27 నక్షత్ర వృక్షాలు, 60 సంవత్సరాల వయస్సు గల చెట్లు, 12 రాశుల చెట్లు, నవగ్రహాల చెట్లు ఉన్నాయి.
ఇంకా, రంగురంగుల గులాబీలు, అనేక పూల మొక్కలు వికసిస్తున్నాయి. ఇక్కడి చెట్లు, మొక్కలన్నీ నవగ్రహ దోషాన్ని తొలగిస్తాయని అంటారు.
ఈ అందమైన తోట మధ్యలో, సుమారు నలభై అడుగుల పొడవున్న ఒక వాస్తు భగవానుడుని శయన భంగిమలో ప్రతిష్ఠించారు. ఆయనను దర్శించుకుంటే వాస్తు దోషం తొలగిపోతుంది.
మహాగణపతి వెనుక ఉన్న చిన్న ఆలయంలో, వివాహిత రూపంలో దర్శనమిచ్చే మహావల్లభ గణపతి,  పంచలోహాలలోని దేవసేనాధిపతి ఆయనతో పాటు వివాహిత రూపంలో దర్శనమిస్తారు. వారి సమీపంలో  కళ్యాణసుందరుడు సతీసమేతంగా కూడా దర్శనమిస్తాడు.
శని గోచారం సమయంలో ఈ మహా శనీశ్వర స్వామిని దర్శించుకోవడం చాలా మంచిది.
ఇంతకూ ఈ ప్రదేశం ఎక్కడ ఉందో చెప్పలేదు కదూ...ఇది తిండివనం నుంచి పుదుచ్చేరికి వెళ్లే మార్గ మధ్యంలో ఉంది. ఆరోవిల్ ప్రాంతానికి సుమారు ఐదు కిలోమీటర్ల దూరంలో, విల్లుపురం జిల్లాలో మొరట్టాండి అనే ఒక చిన్న గ్రామం ఉంది. ఇక్కడి నవగ్రహ దేవాలయంలోనే ఈ ఎత్తయిన శనీశ్వరుడి విగ్రహం ఉంది.
మొరట్టాండి అనే పేరు వినడానికి వింతగా అనిపించవచ్చు. చాలా సంవత్సరాల క్రితం ఈ గ్రామంలో ఒక సిద్ధుడు నివసించేవాడని, అతని పేరు మొరట్టాండి అయి ఉండవచ్చని, అందుకే ఆ గ్రామానికి ఆ పేరు వచ్చిందని చెప్పేవారున్నారు.