అక్షరాల ఆహ్వానం: - గుండ్లపల్లి రాజేంప్రసాద్, భాగ్యనగరం

అక్షరాలు రమ్మంటున్నాయి —

అంతరంగ ద్వారాలు తట్టుతూ

మౌనపు ముసుగులు తొలగించి

మనసుని వెలుగులో నింపమంటున్నాయి…

అక్షరాలు రాయమంటున్నాయి —

ఆలోచనల ఆకాశంపై

కలల్ని రెక్కలుగా కట్టి

కవితలుగా కురిపించమంటున్నాయి…

అక్షరాలు అలంకరించమంటున్నాయి —

భావాల బొమ్మలపై

భాషా రంగులు పూసి

సౌందర్యాన్ని చిమ్మమంటున్నాయి…

అక్షరాలు అలరించమంటున్నాయి —

మధుర గీతాల లయలో

మనసుల్ని మురిపించి

మురళీ స్వరాల మ్రోగించమంటున్నాయి…

అక్షరాలు అల్లమంటున్నాయి —

ఊహల ఉయ్యాలల్లో

ప్రేమ తంతువులతో

కవితల పూదోట నేయమంటున్నాయి…

అక్షరాలు చల్లమంటున్నాయి —

చింతల వేడి మోపిన హృదయాలపై

స్నేహపు చినుకులై

శాంతిని చిందించమంటున్నాయి…

అక్షరాలు ఆడమంటున్నాయి —

పదాల పందిరిలో

పలుకుల పల్లకిలో

పిల్లల హాస్యంలా విరియమంటున్నాయి…

అక్షరాలు పాడమంటున్నాయి —

పలుకుల పాటలలో

ప్రేమ రాగాలపై

ప్రపంచాన్ని మైమరపించమంటున్నాయి…

అక్షరాలు మ్రోగించమంటున్నాయి —

నిజాల నాదాలై

నిర్భయ స్వరాలై

నిశ్శబ్దాన్ని ఛేదించమంటున్నాయి…

అక్షరాలు వెలిగించమంటున్నాయి —

అజ్ఞాన అంధకారంలో

జ్ఞాన దీపాలై

జీవిత మార్గాన్ని చూపమంటున్నాయి…

అక్షరాలే ఆణిముత్యాలు —

అక్షరాలే అపురూపాలు —

అక్షరాలే అమారజీవాలు —

అక్షరాలే అమృతధారలు!

అక్షరాలే అందం —

అక్షరాలే ఆనందం —

అక్షరాలే అంతరంగప్రకాశం —

అక్షరాలే ఆత్మస్వరూపం!

.