పిల్లలు తలచుకుంటే ... : - యామిజాల జగదీశ్

 పెద్దలు వదిలేసిన గ్రామంలోని సమస్యలను చిన్న పిల్లలు భుజాన వేసుకుంటే ఏం జరుగుతుందో మీకు తెలుసా?
ఛత్తీస్‌గఢ్ రాష్ట్రంలోని ఒక గ్రామంలో జరిగిన ఈ సంఘటన ఎవరినైనా ఆశ్చర్య పరుస్తుంది.
ఆ గ్రామంలోని ఒక ముఖ్య మైన చెరువు పూర్తిగా నాచు, చెత్త, వ్యర్థాలతో నిండిపోయి నిరుపయోగంగా మారింది.
స్థానిక రాజకీయ నాయకులు, అధికారుల నిర్లక్ష్యం వల్ల దానిని ఎవరూ గమనించలేదు.
ఎవరైనా ఏదైనా చెప్పినా దానిని అసలు పట్టించు కోలేదు.‌
పరిపాలనలో పారదర్శకత లోపించడం వల్ల పాలన పూర్తిగా విఫలమైంది. సమాజం పట్ల ఎవరికీ బాధ్యత అనేది లేకుండాపోయింది.
ఇలాంటి పరిస్థితుల్లో ఆ గ్రామంలోని చిన్న పిల్లలు ఒక పెద్ద నిర్ణయం తీసుకున్నారు.
పాత టైర్ ట్యూబుల సహాయంతో, వారు ఆ మురికి చెరువులోకి దిగి నాచును, చెత్తను తొలగించడం ప్రారంభించారు.
ఈ పిల్లలు చూపిన అద్భుతమైన ప్రజా సేవను, నాయకత్వాన్ని చూసి గ్రామ మహిళలు, ఇతర పెద్దలు సిగ్గుపడ్డారు.
వెంటనే, వారు కూడా పిల్లలతో కలిసి చెరువును శుభ్రం చేయడం ప్రారంభించారు.
అందరి కృషి ఫలితంగా, చెరువు స్వల్పకాలంలోనే శుభ్రపడింది.
నిజమైన ప్రజాస్వామ్యంలో మార్పు తీసుకురావడానికి వయసు అడ్డంకి కాదని ఈ పిల్లలు నిరూపించారు.
తమ చిన్ని చేతులతో, వారు చెరువును శుభ్రపరచడమే కాకుండా...బాధ్యతారహితంగా ఉన్న సమాజపు మనస్సాక్షి దుమ్ముదులిపారు!