కాలమయ్యారంటే ఏమిటి?: - - యామిజాల జగదీశ్

 కాలంలో ఉండటం అంటే ఏమిటి? అలాగే కాలంలో లేకపోవడం అంటే ఏమిటి?
"నేను ఈ శరీరం, ఈ మనస్సు" అని అనుకోవడమే కాలం.
శరీరానికి పుట్టుక ఉంది, చావు ఉంది. మనస్సుకు నిన్న ఉంది, రేపు ఉంది. రెండూ మారుతూనే ఉంటాయి. అందుకే కాలంలో అంటే...
జ్ఞాపకాల్లో బతకడం : నిన్న జరిగినదాన్ని మోస్తూ తిరగడం. అవమానం, గర్వం, గాయం అక్కడ మోయడం.
కల్పనలో బతకడం : రేపు ఏమవుతుందోనని భయపడటం, ఆశపడటం. ఇంకా రాని దాని కోసం ఇప్పుడు ఉన్న దాన్ని కోల్పోవడం.
అవడం (మారడం) : నేను ఇలా ఉన్నాను, ఇంకా మంచివాడిగా అవ్వాలి, పెద్దవాడిగా అవ్వాలి. ఈ "అవ్వడం" అనే పరుగే కాలం.
సంక్షిప్తంగా చెప్పాలంటే, "నేను సంపూర్ణంగా లేను, ఇకముందే సంపూర్ణమవ్వాలి" అనే ఆలోచనే కాలం. ఆ ఆలోచన ఉన్నంతవరకు నువ్వు కాలంలోనే ఉన్నావు.
లేకుండా ఉండటం అంటే ఏమిటి?
అది "శూన్యమైపోవడం" కాదు. "నేను ఈ శరీరం, ఈ మనస్సు కాదు" అని తెలుసుకోవడం.
కాలం లేకుండా ఉండటం అంటే...
ఇప్పుడు ఉన్నాయి : నిన్న లేదు, రేపు లేదు. ఈ క్షణం మాత్రమే. ఈ క్షణానికి మొదలు, ముగింపు లేవు. అందువల్ల దానికి కాలం లేదు.
సాక్షిగా (చూసేవాడిగా) ఉండటం : కోపం వస్తుంది, పోతుంది. సంతోషం వస్తుంది, పోతుంది. వయసు మారుతుంది. కానీ అన్నీ రావడం, పోవడాన్ని చూస్తే ఒకటి మాత్రం రావడం లేదు, పోవడం లేదు. దానికి పుట్టుక, చావు లేవు, అందుకే కాలమూ లేదు.
అవ్వాల్సింది ఏమీ లేదనే స్పష్టత : నువ్వు ఇప్పటికే సంపూర్ణమవు. అవ్వడానికి, సాధించడానికి ఏమీ లేదు.
జీవితమనే కథలో, జీవించే పాత్ర "నేను ఎవరు?" అని ప్రశ్నించుకుని పక్కకు నిలబడి చూస్తే, కథ ఆగిపోతుంది, పరుగూ ఆగిపోతుంది.
పరుగు ఆగితే కాలమూ ఆగిపోతుంది.
జ్ఞానులు తమకు కాలం లేదని చెప్తారు, ఎందుకంటే కాలానికి వెలుపల నిలబడి చూస్తున్నారు. మనమే కాలంలో చిక్కుకుపోయాం.
జ్ఞాని కాలాన్ని దాటినవాడు, కాలంలో ఉన్న మనకు హెచ్చరిక ఇస్తున్నాడు : "నువ్వు ఇంకా కాలంలోనే ఉన్నావు, జాగ్రత్త" అని.
"ఇప్పుడు" అనేది ఒక భాగం కాదు. అది కాలానికి ద్వారం. నిన్న లేదు, రేపు లేదు. ఎప్పుడూ "ఇప్పుడే" ఉంది. దానికి ప్రారంభం లేదు, ముగింపు లేదు.
మనం సాధారణంగా ఎవరైనా చనిపోతే "కాలమయ్యారు" (కాలధర్మం చెందారు) అని చెప్తాము. కానీ ఆ మాటలో ఒక గొప్ప సత్యం దాగి ఉంది.
కాలమయ్యారంటే ఏమిటి?
కాలం నుండి విడుదల : అంతవరకు ఆయన శరీరం అనే గడియారంలో, మనస్సు అనే క్యాలెండర్‌లో ఉన్నారు. పుట్టిన తేదీ, చనిపోయిన తేదీ, వయసు అన్నీ ఉన్నాయి. "కాలమ య్యారు" అంటే, ఆ గడియారాన్ని పగులగొట్టి బయటకు వెళ్ళిపోయారని అర్థం. ఇక ఆయనకు తేదీ లేదు, వయసు లేదు.
కాలంలో కలిసిపోయారు : సముద్రంలో పడిన ఉప్పు లాగా. ఉప్పు విడిగా కనిపించదు, కానీ నీటిలో పూర్తిగా కలిసిపోతుంది. శరీరం, పేరు, ఊరు అనే గుర్తింపు పోయి, కాలమనే పెద్ద ప్రవాహంలో కలిసిపోయారు.
కాలంతో కొలవలేనివారయ్యారు : బతికున్నప్పుడు "ఆయనకు 60 ఏళ్లు" అని కాలాన్ని బట్టి కొలిచాం. ఇప్పుడు "కాలమయ్యారు" అంటే, ఇకపై ఆయన్ను కాలంతో కొలవలేం. ఆయనే కాలంగా మారిపోయారు.
ఎలా? శరీరం ఉంది, కానీ "నేను ఈ శరీరం" అనే ఆలోచన చనిపోయింది. అదే బతికున్నప్పుడే కాలమవ్వడం. సాధారణ మనిషి చనిపోతేనే కాలమవుతాడు. జ్ఞాని బతికుండగానే కాలమైపోతాడు. దాన్నే 'జీవన్ముక్తి' అంటారు. జ్ఞానమే విడుదల.